Қабырға суретіне тамсанған мегаполис тұрғындары да оны бейнетаспаға түсіріп өз ризашылығын білдірді
Алматының орталығында Қазақстан аналарына арналған мурал пайда болды. Ол бір күн бұрын Қабанбай батыр, 71-үй мекенжайында салынды.
15 мамыр – қабырға суретінің ашылу күні. Бұл күні танымал қазақстандық блогер әрі кәсіпкер Жека Фатбеллидың анасы дүниеге келді. Ол – ерекше жобаның негізін қалаушы.
«Енді біздің анамызға, бүкіл Қазақстандық анаға арналған қабырғаға салынған сурет бар. Ұйқысыз түндеріңіз бен мейіріміңіз үшін, балаға деген риясыз махаббатыңыз үшін рақмет», – деді блогер.
Алматылық екі танымал суретші Жұмаділ Елеукенов пен Рауан Нүсіп үйдің қабырғасына сурет салумен айналысады. Жұмаділ – Алматыдағы COVID-19 күрескерлеріне арналған алғашқы қабырға суретінің авторы. Оның туындысына Құрманғазы мен Шәріпов көшелерінің қиылысында тамсануға болады. Жұмаділдің анасы қалада дәрігер қызметін атқарады. Анасы мен әріптестерінің ерлігін көріп, шабыт алғанын айтады.
Сондай-ақ жас қазақстандықтың суретшінің туындылары елде ғана емес, шетелде де танымал. Мысалы, ол танымал американдық рэпер Дрейкпен жұмыс істеген.
Алматылық Рауан Нүсіп те – белгілі суретші. Оның шығармаларының ішіндегі танымал туындысын Әл-Фараби даңғылының бойында Меңдіқұлов пен Достық көшесінің қилысында орналасқан тұрғын үй қабырғасынан көруге болады.
Қабырға суретіне тамсанған мегаполис тұрғындары да оны бейнетаспаға түсіріп өз ризашылығын білдірді:
«Сурет өте әдемі салынған. Сымбатты жігіттерге рақмет!»
Дереккөз: Almaty.tv.